Exo 12 | MEU | STEP | Bena Iehova ese Mose bona Aaron e hereva henidia, Aigupto tanona ai, eto.

Exodus 12

Iehova ena hahedua

1 Bena Iehova ese Mose bona Aaron e hereva henidia, Aigupto tanona ai, eto. 2 Ina hua na hua gini-gunana ai bainela umui emui ai, emui laḡani matamana huana ai bainela. 3 Israel taudia iboudiai edia hebou ai ba hereva henidia, ina hua dinana ihagwautana, ta ta ena iduhu ena iduhu ai mamoe natudia bae abidia, ruma ta mamoe natuna ta, unu bae abidia toma. 4 A ruma ta taudia basie hoho, una ruma taudia bona e gini hetabira rumana taudia na mamoe natuna ta bae abia hebou, taunimanina hahidaosi na vamu iani-orena bae davana heḡereḡerena. 5 Emui mamoe na asi toutouna ḡauna, maruane, laḡani tamona ḡauna; mamoe serina amo bavabia eiava nani serina amo. 6 Ba balaia heni ela bona hua dinana ihagwauta-hanina ai; bena dina baine hakere ai Israel hegogona idoinai ese edia mamoe natudia bae aladia mase. 7 Bena rarana bavabia, iduara ihua-ihuana kahana kahana audia bona daena auna ba dahulai, bae ani rumadia ai. 8 Una hanuaboi amui aniani na mamoe natuna hidiona, amu ai bae guraia, bona flaoa kavakava, muramura ai basie hatubua, bona aniani avadia iditadia. 9 Kasirina ai basio ania, bona basio nadua; tau-anina idoinai amu ai ba guraia, mai kwarana, mai imana, mai aena, bona mai bogana ida. 10 Bahuna taina basine mia rani; lahi ai ba haḡolea oho. 11 Ini bavania tona: emui rami ba hekasilai, emui tamaka aemui ai, emui itotohi imamui ai. Bavani haraḡa: una na Iehova ena lagau hanai. 12 Badina be una hanuaboi ai Aigupto tanona baina rakaia hanai, natudia roboadia iboudiai baina aladia mase, taunimanima bona boromakau danu; bona Aigupto diravadia iboudia danu baina hahemaoro henidia; lau binai Iehova. 13 Hari rara na toa ai bainela emui noho rumadia ai; rara baina itaia negana ai, baina lagaumui hanai hahedika ta emui ai basine kau, basine alamui, imagu na Aigupto ai baine kau negana ai. 14 Ina dina danu ba laloa tao hanaihanai; ariana danu ba karaia Iehova ena; uru iboudiai bae karaia, taravana danu bae atua. 15 Dina hitu flaoa dikeadia, asie hatubu ḡaudia, bavani; dina gini-gunana ai hatubu muramurana idoinai emui ruma ai mia na bavatoa tabe murimuri ai: badina be dina gini-gunana ela bona dina ihahituna, e hatubua flaoana baine ania tauna na Israel besena amo bae negea daure. 16 Dina gini-gunana ai hebou helaḡana ai ba hebou, bona dina ihahituna ai hebou helaḡana ai ma ba hebou; unu dina ruaosi lalaidai ḡaukara ta basio karaia, hebou taudia adia aniani idabarana mo vadaeni.

17 Flaoa-asie-hatubua Ariana unu ba karaia toma: badina be emui orea loḡora Aigupto amo name hakaudia lasi dinana binai; taunabunai hari dina na uru iboudiai ese bae badinaia bona taravana bae atua ela bona hanaihanai. 18 Hua gini-gunana dinana ihagwauta-hanina adorahina ai asie hatubua flaoana bavania, ela bona dina iharuahui-tana adorahina. 19 Dina hitu flaoa ihatubuna muramurana basie mia emui ruma ai: badina be e hatubua flaoana baine ania tauna, ena be noho-hedoa tauna eiava Isreal tauna korikori, to Israel hebouna amo bae nega daure. 20 E hatubua ḡauna ta basio ania; emui noho gabudia iboudiai flaoa dikeadia, asie hatubu ḡaudia, mo bavani.

21 Bena Mose ese Israel tau-badadia iboudiai e boiridia, e haduadia, eto, Mamoe natudia bavabi hidi, iduhu ta ta adia, lagau-hanai ḡauna bavalaia mase. 22 Muramura avana iḡuina bavabia, rara dihuna ai ba urua diho, iduara ihua-ihuama kahana kahana audia bona iduara daena auna na dihu rarana amo ba dahudia; bena atu ta ena ruma iduarana amo basine raka lasi ela bona daba. 23 Badina be Iehova ese ina tano baine rakaia hanai, Aigupto taudia baine aladia mase; a rara iduara daene auna ai bona iduara ihua-ihuana kahana kahana audia ai baine itaia negana ai, Iehova ese una iduara baine lagaua hanai, hahedika ḡauna baine laoa ahu, emui ruma ai basine raka vareai, basine hamasemui. 24 Ina kara ba badinaia bona taravana bavatua, oiemu bona natumu edia, ela bona hanaihanai. 25 Benaini, Iehova ese baine henimui tanona ai ba kau, ena gwauhamata heḡereḡerena negana ai ina toma-diho karana ba badinaia. 26 Bena natumui bae nanadaimui, baeto “Ina toma-diho karana anina be dahaka?”, 27 umui ba haere, baoto “Ina na Iehova ena lagau-hanai boubou karana; Aigupto ai ia ese Israel taudia edia ruma e lagaudia hanai, Aigupto taudia mo e aladia mase, eda iduhu iboudiai e hamauridia”.Bena taunimanima iboudiai e igo diho, e toma diho, e toma diho. 28 Bena Israel taudia na ela, Mose bona Aaron e haduadia heḡereḡerena unu mo e kara toma.

Hahehisi ihagwautana: Maruane roboadia ihamasedia

29 Bena una hanuaboi malokihina ai Iehova ese roboadia iboudiai Aigupto tanona idoinai e aladia mase, Farao, terono ai e helaiva tauna, natuna roboana, ela bona dibura rumana ai e hekouva tauna natuna roboana, bona boromakau natudia roboadia danu. 30 Bena Farao bona ena hesiai taudia iboudiai bona Aigupto taudia iboudiai na hanuaboi ai e tore isi; bena taitai badana e vara Aigupto tanona ai, badina be ruma ta mase asi se kwabu.

31 Bena hanuaboi ai Farao ese Mose bona Aaron e haduadia, eto, A tore isi, egu orea taudia bogaragidia amo ba raka lasi, umui bona Israel taudia iboudiai. Aola, Iehova ba toma henia diho, emui hereva heḡereḡerena. 32 Emui mamoe seridia bona emui boromakau seridia danu ba laohai, emui hereva heḡereḡerena. Vada aola: lau danu ba hanamogu. 33 Aigupto taudia ese danu e haduadia goadagoada, edia tano amo bae raka lasi haraḡa-haraḡa eto. Badina be idia eto, Ai iboumai ai baia mase na garina.

34 Bena Israel taudia ese edia flaoa, ranu ai e kui ḡaudia, e abi, edia kuikui dihudia danu e abi, edia dabua ai e kumi, e dibu ela. 35 Bena Israel taudia ese Mose ena hereva e badinaia, Aigupto taudia ediai herahera ḡaudia,gold bonasilver amo e karava, bona dabua e noi. 36 Bena Iehova ese Aigupto taudia lalodia e hakerudia Israel taudia ediai, bena idia ese e noi ḡaudia na e henidia. Unu amo idia ese Aigupto taudia edia Kohu e dadi ore.

37 Bena Israel taudia na Ramese amo e laolao ela bona Sukoto. Aedia amo e raka taudia na domaga tauratoi ^{▼▼Domaga tauratoi 600,000.} sisivana, bona memero kekeni danu. 38 Orea idau-idau taudia hutuma ese e bamodia; edia mamoe seridia bona edia boromakau seridia danu momo herea. 39 Bena hari flaoa ranu ai e kui, Aigupto tanona amo e raka lasi negana ai e abia kau ḡauna, na e gabua; ia na asie hatubua ḡauna. Badina be Aigupto amo e luludia lasi negana ai idia na asi edia halahe dalana bona asi edia nega bae nanadu.

40 Hari Israel besena Aigupto tanona ai e nohova laḡanidia iboudiai na sinahu-hani toi-ahui. 41 Laḡani sinahu-hani toi-ahui e ore dinana korikorina, Iehova ena orea iboudiai na Aigupto tanona amo e raka lasi. 42 Una hanuaboi na bae badinaia tarika-tarika Iehova vairanai, ia ese Aigupto tanona amo e hakaudia lasi dainai: una hanuaboi na Iehova ena, Israel taudia iboudiai bae badinaia ela uru iboudiai.

43 Iehova ese Mose bona Aaron e hereva henidia, eto, Lagau-hanai taravatuna binai: idau tauna ta basine ania; 44 a emui hesiai taudia moni amo o hoidia na ba peritomedia, marinai vada bae ania. 45 A noho-kau tauna bona e ḡaukaramu mai davana tauna na basie ania. 46 Ruma lalonai bavania; hidiona taina basio laohaia murimuri ai, bona turiana ta basio hakwaidua. 47 Israel hebouna idoinai vada bae ania. 48 A idau bese tauna bogaragimui ai e nohomu na bame ura Iehova ena lagau-hanai baine badinaia, ena ruma taudia mamaruanedia baine peritomedia guna, murinai ia na baine raka kahira, baine ania; badina be ia na emui ruma tauna korikorina na heto. A se peritomea tauna na basine ania. 49 Taravatu be tamona, Israel tauna korikori enai bona noho-kau tauna enai.

50 Taunabunai Israel taudia na unu e kara toma. Mose bona Aaron ese e haḡanidia heḡereḡerena. 51 Bena una dina ai Iehova ese Israel taudia edia orea iboudiai na Aigupto tanona amo e hakaudia lasi.